Ég hjólaði í gegnum Nauthólsvík með Sambó á sunnudaginn. Það var kostulegt. Allt skítstappað af fólki á sundfötum... samt var svona tólf stiga hiti. Það sem vakti hjá mér mestan óhug var þessi ferkantaði heitipottur þarna upp við húsið. Ofan í honum voru svona 130 manns, allir ógeðslega klesstir upp við næsta mann. Svo glampaði á húðfitubrákina ofan á vatninu. Oj bara. Ég er ekki einu sinni viss um að það sé klór þarna ofan í en endilega skellið ykkur út í ef þið hafið lyst (og ef það er pláss). Svo hjóluðum við suður í Hafnarfjörð og viti menn - það er önnur manngerð strönd á höfuðborgarsvæðinu og það í Garðabæ af öllum stöðum. Þar var enginn og allt miklu snyrtilegra. Ég veit samt ekki hvort það er heitt vatn þar. Kannski get ég bara fengið fengið mér kajak og siglt beint þangað heiman frá mér í þessa þrjá daga á ári sem hægt er að liggja í sólbaði á þessu landi.